රටේ වෙනත් බොහෝ ක්ෂේත්‍රවල මෙන්ම, අපගේ ප්‍රාග්ධන වෙළෙඳපොළ තුළද බොහෝ අවස්ථාවන් මග හැරී ඇති අතර එහි සැබෑ හැකියාවට අනුව ක්‍රියා කර නොමැති බව මාගේ අදහසයි.සත්‍ය වශයෙන්ම ගත්විට, රටක් වශයෙන්, යහපත් හා සමෘද්ධිමත්භාවයක් සහිත සංවර්ධිත ජාතියක් බවට පත්වීමට අපි සිහින මැව්වෙමු. අප එම දැක්ම ඉටුකර ගැනීමට අවශ්‍ය නිපුණතාවන්, කැපවීමෙන් සහ උනන්දුවෙන් අත්පත් කර ගැනීමට ක්‍රියාකළ යුතුය.

අප ආර්ථිකය මුහුණ දෙන ෆිස්කල් හා මූල්‍යමය බාධාවන් සැලකිල්ලට ගෙන, රටේ වර්ධන මාවත නැවත ස්ථානගත කිරීමේදී පෞද්ගලික අංශය විසින් සිදු කළ යුතු වැදගත් කාර්යභාරය වඩා පැහැදිලිය. ඒ අනුව, පෞද්ගලික අංශයේ වර්ධනයට රුකුලක් වන ශක්තිමත් ප්‍රාග්ධන වෙළෙඳපොළක අවශ්‍යතාවය වෙන කවරදාකටත් වඩා හොඳින් දැනේ. ශක්තිමත් හා තිරසාර ප්‍රාග්ධන වෙළෙඳපොළක් නිර්මාණය කිරීම සඳහා අදාළ සියලු අංශ නියාමනය කිරීමේ ප්‍රබල කර්තව්‍යයක් ශ්‍රී ලංකා සුරැකුම්පත් සහ විනිමය කොමිෂන් සභාවට පැවරී ඇත.

මරියානා මසුකාටෝ සිය ‘ව්‍යවසායකත්ව රාජ්‍යය’ නම් කෘතිය තුළින් පෙන්වාදී ඇත්තේ නවෝත්පාදන හා ආර්ථික පරිවර්තනය සඳහා රජය පෙරමුණ ගත යුතු බවයි. මසුකාටෝ සඳහන් කරන ආකාරයට චීනයේ , දකුණු කොරියාවේ, සිංගප්පුරුවේ, තායිවානයේ සහ මැලේසියාවේ ශීඝ්‍ර දියුණුවට තුඩු දුන්නේ රජය නිසි ප්‍රමාණයෙන් ව්‍යාපාර ලෝකයට මැදිහත් වූ නිසාය. එම මැදිහත්වීම පෞද්ගලික අංශයට ඇඟිලි ගැසීමක් නොවූ නමුත් වර්ධනය සහ නවීකරණය ළඟා කර ගැනීමට හොඳින් සැළසුම් කරන ලද සාර්ථක මැදිහත්වීමකි.

තවද, හාවඩ් විශ්වවිද්‍යාලයේ කීර්තිමත් මහාචාර්ය රිකාඩෝ හවුස්මාන් ද සඳහන් කරන්නේ ශ්‍රී ලංකාවේ ප්‍රධාන ගැටලුව බවට පත්ව ඇත්තේ ඇඟලුම් වැනි සාපේක්ෂව සරල නිෂ්පාදනයන් නිෂ්පාදනය කිරීමේ සිට ඉහළ වටිනාකමකින් යුත් භාණ්ඩ හා තාක්‍ෂණික වශයෙන් දියුණුවන අංශ කරා යාමට පෞද්ගලික අංශයට හැකියාවක් නොමැති බවයි. ශ්‍රී ලංකාව මෙන් ම සමකාලීනව ඔවුන් ඇඟලුම් නිෂ්පාදනය ආරම්භ කළද, ආසියානු රටවල සාර්ථකත්වය වූයේ ඔවුන්ගේ පෞද්ගලික අංශයට ඇඟලුම්වල සිට ඉලෙක්ට්‍රොනික හා යන්ත්‍රෝපකරණ නිෂ්පාදන වැනි වටිනා අංශ වෙත යාමට ඇති හැකියාවයි.

ආයෝජන අප පසුකර වෙනත් රටවල් වෙත යාම දැකීම කනගාටුවට කරුණකි. දකුණු කොරියාව, සිංගප්පූරුව සහ වියට්නාමයේ මූල්‍ය හා සුරැකුම්පත් නීති ප්‍රතිසංස්කරණ මගින් විදේශීය සෘජු ආයෝජන ගලා ඒම තීව්‍ර කරන බවට පාඩම් අපට සපයන බව පැවසීමට මා කැමතිය. ඉතා මෑතකදී, වැඩිදියුණු වන ආර්ථිකයක් සහ නව ලැයිස්තුගත කිරීම් රැල්ලක් මගින් මහාපරිමාණ විදේශීය ආයෝජකයින්ගෙන් අරමුදල් ලබා ගැනීමට වියට්නාමයට හැකි වී තිබේ. වියට්නාම කොටස් මෑත අතීතයේ ආසියාවේ හොඳම ලාභ ලබාගෙන ඇති අතර, හො චි මිං කොටස් හුවමාරුව ලෝකයේ හොඳම කාර්ය සාධනයයන් සහිත කොටස් වෙළෙඳපොළවල් අතරින් එකක් බවට පත් වී තිබේ. පසුගිය දෙවසර තුළ එහි කාර්යසාධනය දෙගුණ වී තිබුණද, එම කොටස් හුවමාරුව තවමත් “Frontier” වෙළෙඳපොළක් ලෙස වර්ගීකරණය කර තිබීම දැකගත හැකිවේ.

විශ්ලේෂකයින් පවසන්නේ ගෝලීය අරමුදල් සහ ඉහළ ආයෝජකයින් මෙම රටවල ආර්ථිකයන් වෙත ඇදී යන්නේ ගෝලීය වෙළෙඳ පද්ධතියට ඔවුන් සම්බන්ධ වී තිබීම හා විදේශීය නිෂ්පාදන කේන්ද්‍රයක් ලෙස ස්ථානගතවී තිබීම හේතුවෙනි. එය තවදුරටත් වර්ධනය වීමට හේතුවක් වී ඇත්තේ, චීනය සහ එක්සත් ජනපදය අතර පවතින මතභේදකාරී තත්ත්වය හමුවේ මෙම රටවල් වාසි අත්කරගනීමයි. එනම් ලොව ප්‍රධාන පෙළේ සමාගම් ද්විත්ව ලැයිස්තුගත කිරීම් සළකා බලමින් සිටීමත් චීනයෙන් හා එක්සත් ජනපදයෙන් නිෂ්පාදන විශාල ප්‍රමාණයක් ඉවත්ව ඉහළ වටිනාකමක් සහිත කර්මාන්තශාලා පිහිටුවා මෙම රටවල්වල ස්ථානගතවී මෙම රටවල්වල ආර්ථිකයට දායක වී වාසි අත්කරගනිමින් සිටීමයි.

මේ අනුව, ආර්ථික වර්ධනය හා පරිවර්තනය සඳහා රජයේ නිෂ්ක්‍රීය භූමිකාව සම්බන්ධ සාම්ප්‍රදායික මතයන් පිළිබඳ විවිධ මිථ්‍යාවන් අභියෝගයට ලක් නොවන්නේ නම්, අපේ රට මුහුණ දී සිටින ව්‍යුහාත්මක ආර්ථික අභියෝගයන්ට මුහුණ දීමක් අපට බලාපොරොත්තු විය නොහැක. ඒ හා සමානව ශ්‍රී ලංකා සුරැකුම්පත් සහ විනිමය කොමිෂන් සභාව තවදුරටත් එහි සාම්ප්‍රදායික භූමිකාවට හා සාම්ප්‍රදායික ප්‍රවේශයට සීමා කළ නොහැක. වෙළෙඳපොළ නියාමනය සහ වෙළෙඳපොළ සංවර්ධනය අතර නිවැරදි සමතුලිතතාවයක් පවත්වාගනිමින් ප්‍රාග්ධන උත්පාදනයට දිරිගැන්වීමක් ලබා දීමේ අරමුණින් සුරැකුම්පත් සහ විනිමය කොමිෂන් සභාව සිය භූමිකාව නැවත සකස් කිරීම අත්‍යවශ්‍ය වේ.

දීර්ඝ කථාවක් කෙටියෙන් කිවහොත්, මට මෙහිදී අවධාරණය කිරීමට අවශ්‍ය වන්නේ , එම රටවල රජයන් පෞද්ගලික අංශයට සමෘද්ධිමත් වීමට සුදුසු පරිසරයක් නිර්මාණය කර ඇති ආකාරය සහ ඔවුන් තම සමාගම්වලට ගෝලීය ප්‍රමුඛ පෙළේ සමාගම් බවට පත්වීමට පහසුකම් සළසා ඇති ආකාරයත් සහ එම මට්ටමට ළඟාවීමට අපගේ පෞද්ගලික අංශයට අප සහාය විය යුත්තේ ඇයි ද යන්නයි.

ඇත්ත වශයෙන්ම, අපගේ වෙළෙඳපොළ රජය එහි වර්ධනයට හා ව්‍යාප්තියට සහාය දෙන තෙක් බලා සිටින නමුත් එ සඳහා උදව් කිරීමට අප අතිශයින් මන්දගාමී වී සිටිමු. උදාහරණයක් ලෙස, දේපල ආයෝජන භාර වෙළෙඳපොළට හඳුන්වා දීමට අපට හැකියාව ලැබුණි. එහෙත් එය අවම වශයෙන් අවුරුදු දහයකට පෙර කළ යුතුව තිබූ දෙයකි.

විශේෂයෙන්ම අරමුදල් සංවර්ධන ව්‍යාපෘති සඳහා පොදු වෙළෙඳපොළ යොදාගැනීමේදී සහ ජාතික වැදගත්කමක් ඇති ක්‍රියාකාරකම් සඳහා පෞද්ගලික අංශයේ සහභාගීත්වයේදී රජයේ අරමුදල් සම්පාදන අවශ්‍යතාවයන් සඳහා උපකාරී වන වෙළෙඳපොළ යටිතල පහසුකම් කොළඹ කොටස් හුවමාරුවට සතුව ඇත. පෞද්ගලික ආයතන මෙන් ම, රජයද ඉදිරියට යාමේ දී විවිධ හා විකල්ප අරමුදල් ප්‍රභවයන් කෙරෙහි ද අවධානය යොමු කරනු ඇතැයි අපි අපේක්ෂා කරමු.

වසර ගණනාවක් තිස්සේ අපගේ ගැටලුව වූයේ සැළකිය යුතු කාලයක් සඳහා අඛණ්ඩව 6% කට වැඩි වර්ධන වේගයක් පවත්වා ගැනීමට අපට නොහැකිවීමයි. එහෙත් ආසියාවේ සාර්ථකත්වයන් දෙස බලන විට මෑත අතීතයේ සංවර්ධිත තත්ත්වය අත්කර ගත් රටවල් 7-8% කට වඩා අඛණ්ඩව වර්ධන අනුපාතයක් සැලකිය යුතු කාලයක් සඳහා පවත්වාගෙනයාමට සමත් වී ඇත. ජනාධිපති ලේකම් ආචාර්ය පී.බී. ජයසුන්දර මහතා මෑතකදී Daily FT පුවත්පත සමඟ සම්මුඛ සාකච්ඡාවකට එක්වෙමින් කියා සිටියේ පශ්චාත් වසංගත තත්ත්වය සමඟ පහළ වැටුණු ආර්ථික වාතාවරණය, ශ්‍රී ලංකාවට 7-8% ක වර්ධනයක් සඳහා සූදානම් වීමට හා ළඟා කර ගැනීමට මෙන්ම තිරසාර සමාජ-ආර්ථික වර්ධනයක් ඇති කිරීම සඳහා හොඳ අවස්ථාවක් වනු ඇති බවයි.

අනෙක් අතට ආචාර්ය ජයසුන්දර මහතා ප්‍රකාශ කර ඇත්තේ 2021 වසරේ සිට රජය නැවත මූල්‍ය ඒකාබද්ධතා මාවතට පිවිසෙනු ඇති බවයි. එම නිසා, අපගේ ප්‍රාග්ධන වෙළෙඳපොළට ඉදිරියට යාමට හා නව අවස්ථා රාශියක් විවෘත කර තිබෙන වාතාවරණය තුළ මෙම මුලික අරමුණ අවබෝධකර ගනිමින් ව්‍යවසායක ප්‍රජාව සවිබල ගැන්වීමට සෑම උත්සාහයක්ම දැරීමට සුදුසුම අවස්ථාව මෙය වේ.

නියාමනය පැත්තෙන් බලන විට, නව සුරැකුම්පත් හා විනිමය කොමිෂන් සභා පනත බලාත්මක කිරීම තුළින් බලාපොරොත්තු වනුයේ නියාමන බලතල සහ වෙළෙඳපොළ ක්‍රියාකාරකම් ශක්තිමත් කිරීමට ඉහළ ප්‍රමුඛතාවක් ලබාදීමයි. මේ අනුව, නව කොමිෂන් සභාව දැනට පනත් කෙටුම්පතේ විධිවිධාන සමාලෝචනය කිරීමේ ක්‍රියාවලියේ නිරතව සිටී.

පනත් කෙටුම්පත පිළිබඳ විවේචනයන් කේන්ද්‍රගත වී ඇත්තේ බාධක දෙකක් මත ය, ඉන් එකක් වන්නේ ඇතැම් විධිවිධානවල අර්ථය පිළිබඳ පැහැදිලි බව අඩුකමක් හෝ අර්ථයෙහි ව්‍යාකූල බවක් දක්නට ලැබීමයි. අනෙක් බාධකය වන්නේ බලාත්මක කිරීමේ දඬුවම් පරාසයෙහි ප්‍රායෝගික නොවන බව පනත තුළ ගැටලු ඇති කරවිය හැකි වීම සහ එමගින් ශ්‍රී ලංකා සුරැකුම්පත් සහ විනිමය කොමිෂන් සභාවේ බලාත්මක කිරීමේ ක්‍රියාවලිය ක්‍රියාත්මක කිරීමේදී ගැටළු මතු කරවිය හැකිවීමයි. ඇත්ත වශයෙන්ම, නව පනත මගින්, බලාත්මක කිරීමේ ක්‍රියාමාර්ග ගැනීම සුරැකුම්පත් සහ විනිමය කොමිෂන් සභාවට එතරම් අභියෝගාත්මක නොවිය යුතුය.

එබැවින්, මෙම වර්තමාන නීති කෙටුම්පත් කිරීමේ ප්‍රවේශය ප්‍රායෝගිකව ක්‍රියාත්මක කළ හැකි නීතියක් වනු ඇතැයි මා විශ්වාස කරන අතර එමගින් බලාත්මක කිරීම් වඩා පැහැදිළිව හා කඩිනම්ව සිදු කිරීමට හැකියාව ලැබේ. තවද එමගින් සාධාරණ ප්‍රතිපත්තියක් හෝ ප්‍රායෝගික සාධාරණීකරණයකින් තොරව වෙළෙඳපොළ ක්‍රියාකාරකම්වලට අනවශ්‍ය ලෙස බාධා නොකරන අතර පනත් කෙටුම්පත වෙත එල්ල වන විවේචනද ඉවත් කරනු ඇත.

සමස්තයක් ලෙස සුරැකුම්පත් වෙළෙඳපොළක වර්ධනය තුළින් පෙන්නුම් කරනුයේ සමස්තයක් වශයෙන් වෙළෙඳපොළ සහ රට කෙරෙහි ජනතාව තබා ඇති විශ්වාසයයි. කෙසේ වෙතත්, මෑත අතීතයේ දී මතු වූ ගැටළු ගණනාවක් අපට අත්දකින්නට ලැබුණු අතර අපගේ වෙළෙඳපොළ කෙරෙහි ඇති අවංකභාවය හා විශ්වාසයේ යම් අඩුවක් ඊට බලපා ඇති ආකාරය අපි දුටුවෙමු. වෙළෙඳපොළ හා මූල්‍ය පද්ධතියට දැඩි බලපෑම් ඇති කරන ප්‍රමාණවත් බලාත්මක කිරීමේ ක්‍රියාමාර්ග සහ වෘත්තීයමයභාවය නොමැතිකම සමඟ මෙයට සම්බන්ධයක් ඇති බව මා ප්‍රකාශ කිරීමට කැමතිය.

ආයෝජකයින්ගේ අයිතිවාසිකම් අප ආරක්ෂා කළ යුතු බැවින් උවමනාවට වඩා වැඩි නියාමනයක් තුළින් වර්ධනය හා ක්‍රියාකාරී පාර්ශවකරුවන්ගේ සහභාගීත්වය අෛධහිර්යමත් කෙරෙන නිසා වෙළෙඳපොළ නියාමනය කිරීමේදී සුරැකුම්පත් සහ විනිමය කොමිෂන් සභාව නිවැරදි සමබරතාවයක් සහිතව කටයුතු කළ යුතු බවත් අප විසින් නියාමනය කරනු ලබන වෙළෙඳපොළෙහි විශ්වසනීයත්වය කිසිදු විටෙක පහත හෙළීමක් නොකළ යුතු බවත් මා මෙහිදී පැවසිය යුතුය.

අපට ලැබී ඇති බලතල වලට අනුකූලව වෙළෙඳපොළ තුළ අවංකභාවය පවත්වාගැනීමේ අරමුණින් අවදානම අධීක්ෂණය කිරීම, අවම කිරීම සහ කළමනාකරණය කිරීම මෙන්ම පූර්ණ හා නිවැරදි තොරතුරු බෙදා හැරීම තුළින් ආයෝජකයින් ආරක්ෂා වන බවටද සහතික වේ. අනාවරණය කිරීම් පිළිබඳව සහතික වීමෙන් අප බලාපොරොත්තු වනුයේ ආයෝජකයින්ට දැනුවත් ආයෝජන තීරණ ගැනීමට, ආයෝජකයින් තුළ වෙළෙඳපොළ සම්බන්ධව හැඟීම් වැඩි දියුණු කිරීමට මෙන්ම නුසුදුසු ආයෝජන හැසිරීම් වල යෙදීමෙන් වැළැක්වීමයි. මේ අනුව, අනුකූල නොවීම්වලට එරෙහිව ශ්‍රී ලංකා සුරැකුම්පත් සහ විනිමය කොමිෂන් සභාව දැඩි බලාත්මක කිරීමේ ක්‍රියාමාර්ග ගනු ලබන අතර දැඩි නීති රීති පැනවීම ද අඛණ්ඩව සිදු කරනු ඇත.

පසුගිය වසර කිහිපය තුළ ශ්‍රී ලංකාවේ ප්‍රාග්ධන වෙළෙඳපොළ නිසි ලෙස ක්‍රියාත්මක නොවූ බව අප පිළිගත යුතුය. කිසිදු සැකයකින් තොරව අපගේ ප්‍රාග්ධන වෙළෙඳපොළ ස්ථානගත කළ යුත්තේ බැංකු අංශයට අනුපූරකව සහ රටේ වර්ධන ඉලක්කවලට සහාය වීම සඳහා ය. බොහෝ රටවල වේගවත් ආර්ථික වර්ධනයක් පවත්වා ගැනීම සඳහා වෙළෙඳපොළ ශක්තිමත් කිරීම ඉතා වැදගත් වන අතර මෙම ඉලක්කය සපුරා ගැනීම සඳහා ආයෝජකයින් සහ මහජන විශ්වාසය මෙන්ම වෙළෙඳපොළවල අවංකභාවය සහ ඔවුන්ගේ සහභාගීවන්නන්ද අත්‍යවශ්‍ය වේ.

චාලි මන්ගර් පවසන පරිදි, "වැඩ කරන්නේ කුමක්ද, වැඩ නොකරන්නේ කුමක්ද සහ වැඩ නොකරන්නේ ඇයි ද" යන්න අප විසින් සොයාගත යුතුය. ඇත්ත වශයෙන්ම, යම් කෙනෙක් තම ශක්තීන් හා දුර්වලතා හොඳින් හඳුනා ගන්නේ නම් ඔහුට වොරන් බෆට් වැනි ව්‍යාපාරික හවුල්කරුවෙකු සොයා ගැනීම අපහසු නොවන බව මන්ගර් පවසයි. එලෙසම ශ්‍රී ලංකා සුරැකුම්පත් වෙළෙඳපොළ සංවර්ධනය කිරීම සඳහා කැප වූ කොටස් හිමියෙකු ලෙස “උපායමාර්ගික ආයෝජකයෙකු” කොළඹ කොටස් වෙළෙඳපොළ වෙත ඇතුළත් කර ගැනීමට අප පහසුකම් සැලසිය යුතුව ඇති අතර එමගින් අපව තව තවත් ඉදිරියට ගෙන යනු ඇත.

කොළඹ කොටස් හුවමාරුව සහ අපගේ පාර්ශවකරුවන් සමඟ සමීප සාකච්ඡා පැවැත්වීමේ වටිනාකම මම හඳුනා ගතිමි. හුදු අනුකූලතාවයෙන් ඔබ්බට ගිය සංස්කෘතියක් ඇති කිරීමට අපට හැකි වනු ඇතැයි මා බලාපොරොත්තු වෙමි. ශ්‍රී ලංකා සුරැකුම්පත් වෙළෙඳපොළට ඵලදායී ලෙස තරඟ කරමින් රටට අරමුදල් ගලා ඒම ඉහළ නැංවීමට හැකි වන පරිදි නව නිෂ්පාදන හා වෙළෙඳපොළ යටිතල පහසුකම් සංවර්ධනය කිරීම කෙරෙහි අවධානය යොමු කරමින් නව වැඩසටහන් රැසක් සඳහා පහසුකම් සැලසීමට අපි උනන්දු වූයෙමු. ආයෝජන ගමනාන්තයක් ලෙස ආයෝජකයින් අවධානය යොමු කරන අත්‍යවශ්‍ය පූර්ව අවශ්‍යතාවන් වන ආකර්ශනීය තක්සේරු කිරීම්, හොඳින් පාලනය කරන ලද සහ ශක්තිමත් නියාමන රාමුවක්, නවීන යටිතල පහසුකම් සහ ජාත්‍යන්තර මූල්‍ය වාර්තාකරණ ප්‍රමිතීන්ට (IFRS) අනුකූල වන ලැයිස්තුගත සමාගම් අපගේ වෙළෙඳපොළට ඇත. එමනිසා, අපගේ ප්‍රාග්ධන වෙළෙඳපොළට ඇති හැකියාව හා ඔරොත්තු දීමේ ශක්තිය පිළිබඳව අපි සුබවාදීව සිටිමු.

සුරැකුම්පත් සහ විනිමය කොමිෂන් සභාව විසින් මෑතකදී ගනු ලැබූ සමහර මුල පිරීම් පිළිබඳව වඩාත් නිශ්චිත තොරතුරු ඉදිරිපත් කිරීමට මා මෙය අවස්ථාවක් කර ගනිමි.

• කොළඹ කොටස් හුවමාරුවේ මූලික කාර්යයන් ඩිජිටල්කරණය කිරීමේ ඒකාබද්ධ කමිටුව

අපගේ වෙළෙඳපොළට ගැටලුකාරී කාල පරිච්ඡේදය තුළ සිය මූලික ක්‍රියාකාරකම් සිදුකිරීමේ හැකියාව පෙන්නුම් කිරීමට සුදුසු තත්වයක නොසිටි අතර, එයින් ඉස්මතු කර පෙන්නුම් කරනුයේ කිසිදු ප්‍රමාදයකින් තොරව කොටස් වෙළෙඳපොළේ මූලික කාර්යයන් ඩිජිටල්කරණය කිරීමේ අවශ්‍යතාවයි. ඒ අනුව, කොළඹ කොටස් හුවමාරුව ඩිජිටල්කරණය පිළිබඳව සොයා බැලීම සඳහා සුරැකුම්පත් සහ විනිමය කොමිෂන් සභාවේ සභාපතිවරයා විසින් ඒකාබද්ධ කමිටුවක් පත් කරන ලදී. ඩිජිටල්කරණය කිරීමෙන්, කොටස් වෙළෙඳපොළේ සියළුම මූලික ක්‍රියාකාරකම් ඩිජිටල් ලෙස සිදුකිරීමට මෙන්ම විද්‍යුත් වශයෙන් නිශ්කාෂණය සහ බේරුම් කිරීම සඳහා කොළඹ කොටස් හුවමාරුවට අවශ්‍ය යාන්ත්‍රණයන් හඳුන්වා දීමට අපි අපේක්ෂා කරමු. කොටස් තැරැව්කාර සමාගම් සඳහා අදාළ නීති, මධ්‍යම තැන්පතු ක්‍රමය සඳහා වන නීති සහ ලැයිස්තුගත කිරීමේ නීති ආදිය සඳහා අවශ්‍ය සංශෝධන කොමිෂන් සභාව විසින් මෑතකදී අනුමත කරන ලදී. ප්‍රාග්ධන වෙළෙඳපොළ ඩිජිටල්කරණයට පහසුකම් සැළසීම සහ දේශීය ප්‍රාග්ධන වෙළෙඳපොළ ආයෝජකයින්ගේ ඇඟිලි තුඩු අගටම ගෙන ඒම මෙම කාර්යයන් තුළින් අපේක්ෂා කෙරේ.

මේ සම්බන්ධයෙන්, සුරැකුම්පත් සහ විනිමය කොමිෂන් සභාව අවධාරණය කළේ ගෝලීය සුරැකුම්පත් වෙළඳපොලවලට සමගාමීව නවීන සුරැකුම්පත් වෙළඳපොළක් ඇති කිරීම හා සමස්ථයක් ලෙස ශ්‍රී ලංකා ප්‍රාග්ධන වැඩිදියුණු කිරීමේ අරමුණින් තැරැව්කරුවන් රට වෙනුවෙන් ඔවුන්ගේ කාර්යය ඉටු කළ යුතු බැවින් සමස්ත තැරැව්කාර ප්‍රජාවගේ සහයෝගය ඉතා වැදගත් බවයි. සත්‍ය වශයෙන්ම, සුරැකුම්පත් සහ විනිමය කොමිෂන් සභාව සහ කොළඹ කොටස් හුවමාරුව ඒකාබද්ධ කමිටුව මෙතෙක් ලබා ඇති දැවැන්ත ප්‍රගතිය බොහෝ සම්මානයට පාත්‍ර විය යුතු අතර, වෙළෙඳපොළ නවීකරණය කර එය සියලු තත්වයන් යටතේ ක්‍රියාත්මක කරවීම මුලික අපේක්ෂාවයි.

• ප්‍රාග්ධන වෙළෙඳපොළ පුළුල් කිරීම සඳහා ඒකාබද්ධ කමිටුව

ප්‍රාග්ධන වෙළෙඳපොළ පුළුල් කිරීම සඳහා ගත යුතු ක්‍රියාමාර්ග සලකා බැලීමටත්, සාමාන්‍ය ජනතාව අතර දැනුවත්භාවය ඇති කිරීමටත්, ඒ පිළිබඳව නිර්දේශ ඉදිරිපත් කිරීමටත්, සුරැකුම්පත් සහ විනිමය කොමිෂන් සභාව සහ කොළඹ කොටස් වෙළෙඳපොළ නියෝජිතයින් සමඟ ඒකාබද්ධ කමිටුවක් පත් කරන ලදී. තවද, මෙම කමිටුවේ අපේක්ෂාව වනුයේ ප්‍රාග්ධනය ඉහළ නැංවීම සඳහා ප්‍රාග්ධන වෙළඳපොළ භාවිතා කිරීමට සමාගම් දිරිමත් කිරීම, මනා දැක්මක් ඇතිකිරීම හා කලාපීය හා ජාත්‍යන්තර වශයෙන් සහයෝගීතාව වර්ධනය කිරීම, ආයෝජක ප්‍රජාව පුළුල් කිරීමේ අරමුණින් පාර්ශවකරුවන්ගේ අධ්‍යාපනය සහ දැනුවත්භාවය වර්ධනය කිරීම සහ අවසානයේ රටේ සියලුම භූගෝලීය කලාපවල සහ ජාත්‍යන්තරව සුරැකුම්පත් වෙළෙඳපොළ තුළ මහජන සහභාගීත්වය වර්ධනය කිරීමයි.

නෙක් අතට, කොළඹ කොටස් හුවමාරුව, සුරැකුම්පත් සහ විනිමය කොමිෂන් සභාව සමඟ සාකච්ඡා කර පුළුල් පරාසයක විහිදී ඇති සමාගම් කොටස් වෙළෙඳපොළ තුළ ලයිස්තුගත කිරීම් සඳහා අවස්ථාවක් උදා කිරීම සඳහා ලයිස්තුගත කිරීමේ නීති සංශෝධන හඳුන්වා දුන්නේය. මෙම සංශෝධන මඟින් අළුතින් කොටස් නිකුත් කරන්නන්ට ආදායම් උත්පාදනය සහ නව මුදල් ප්‍රවාහ මාර්ග ඔස්සේ අවශ්‍ය සුදුසුකම් සපුරාලීමට නව මංපෙත් නිර්මාණය වනු ඇත.

• කොළඹ කොටස් හුවමාරුව තුළ විදේශ සමාගම්වල ද්විත්ව ලැයිස්තුගත කිරීම් හා සම්බන්ධ ඒකාබද්ධ කමිටුව

වෙළෙඳපොළ විශාලත්වය හා ද්‍රවශීලතාවය ඉහළ නැංවීම සඳහා ගත් පියවරවල කොටසක් ලෙස සහ ශ්‍රී ලංකා රජයේ ප්‍රතිපත්තිමය මඟ පෙන්වීම යටතේ, කෙටි කාලීනව ඉහළ ආර්ථික වර්ධනයක් සඳහා රට තුළ වාතාවරණයක් සැකසීමේ වැදගත්කම සුරැකුම්පත් සහ විනිමය කොමිෂන් සභාව විසින් හඳුනාගෙන තිබේ. එබැවින්, කොළඹ කොටස් හුවමාරුව තුළ වෙළෙඳපොළ ප්‍රාග්ධනීකරණයට, ද්‍රවශීලතා මට්ටම්වලට බාධා වන බාධක හඳුනා ගැනීමට ඒකාබද්ධ කමිටුවක් පත් කරන ලදී. තවද ඇමරිකා එක්සත් ජනපදය-චීනය වැනි රටවල් අතර සිදුවන භූදේශපාලනික ආතතීන් තුළින් ශ්‍රී ලංකා සුරැකුම්පත් වෙළෙඳපොළට තරඟකාරී වාසියක් ලබා ගැනීමට හැකි වන සාධක කෙරෙහි අවධානය යොමු කරමින් හිතකර ප්‍රතිපත්තියක් සහ නියාමන ප්‍රාග්ධන වෙළෙඳපොළ රාමුවක් සැකසීම ට කටයුතු කරන ලදී. මෙම කාර්යය හරහා අපේක්ෂා කළ තවත් අරමුණක් වුයේ මෝර්ගන් ස්ටැන්ලි කැපිටල් ඉන්ටර්නැෂනල් (MSCI) නැගී එන වෙළෙඳපොළ තත්ත්වය කරා ඔසවා තැබීමට ශ්‍රී ලංකාවට පුළුල් ලෙස පහසුකම් සැළසෙනු ඇති බවයි.

ශ්‍රී ලංකා ප්‍රාග්ධන වෙළෙඳපොළට දේපළ වෙළෙඳාම් ආයෝජන භාර (REIT) හඳුන්වා දීම

වර්ෂ 1997 දී සාංගමික ණය සුරැකුම්පත් හඳුන්වා දී වසර 23 කට පසු නව උපකරණයක් ලෙස ලයිස්තුගත දේපොළ වෙළෙඳාම් ආයෝජන භාර ප්‍රාග්ධන වෙළෙඳපොළට හඳුන්වා දීම විශේෂ සිදුවීමක් සනිටුහන් කර ඇත. දේපොළ වෙළෙඳාම් ආයෝජන භාරයට ලැබෙන ආදායමෙන් 90% ක් හෝ ඊට වැඩි ප්‍රමාණයක් ඒකක හිමියන් අතර බෙදා හැරෙන අතර දේපළ වෙළෙඳාම් ආයෝජන භාරයේ ආයෝජනය කරන ආයෝජකයන්ගෙන් ලැබෙන ප්‍රාග්ධනය දේපොළ වෙළෙඳාම් සහ යටිතල පහසුකම් සංවර්ධනයට යෙදවේ. මෙම දේපොළ වෙළෙඳාම් ආයෝජන භාර හරහා සුළු පරිමාණ ආයෝජකයන්ට දේපොළ වෙළෙඳාම් අංශයේ වර්ධනයෙන් සෘජුවම ප්‍රතිලාභ ලබා ගැනීමට හැකියාව ලැබෙනු ඇත. කළමනාකරණ සමාගම් වලට සහ REIT වල භාරකරුවන්ට අදාළ වන නීති ගැසට් පත්‍රයක් මගින් ප්‍රකාශයට පත් කිරීමට අපේක්ෂා කරන අතර REIT ලයිස්තුගත කිරීම සක්‍රීය කිරීම සඳහා ලයිස්තුගත කිරීමේ නීති කෙටුම්පත් කරන ලෙස කොළඹ කොටස් හුවමාරුවට උපදෙස් දෙන ලදී.

• සුරැකුම්පත් හුවමාරු (SE) පනත් කෙටුම්පත සංශෝධනය කිරීම

සුරැකුම්පත් හුවමාරු පනත් කෙටුම්පත පාර්ලිමේන්තුවට සභාගත කර සැළකිය යුතු කාලයක් ගත වුවද එය පාර්ලිමේන්තුව විසුරුවා හැරීමත් සමඟ සාකච්ඡාවට ගැනීමට නොහැකි විය. කෙටුම්පත් කළ පනත නව පාර්ලිමේන්තුවට ඉදිරිපත් කිරීමේ ක්‍රියාවලිය ඉක්මනින් ආරම්භ කිරීමට සිදුවනු ඇත. මෙම කර්තව්‍යය සැළකිල්ලට ගනිමින්, නව කොමිෂන් සභාව මේ වන විට විධිවිධාන විස්තරාත්මකව සමාලෝචනය කිරීමේ ක්‍රියාවලියේ නිරතව සිටී. මේ සම්බන්ධයෙන් තවදුරටත් සලකා බැලීමේදී , නව සුරැකුම්පත් හුවමාරු පනත් කෙටුම්පත ප්‍රායෝගිකව ක්‍රියාත්මක කළ හැකි නීතියක් බවට පරිවර්තනය කිරීමට හා නව පනත සමඟ එකඟ වීමට අවශ්‍ය නීතිමය විශේෂඥතාව හා බුද්ධිමත්භාවයක් සහිත සභාපතිවරයකු හා කොමිසමක් සිටීම අපට වාසනාවකි.

• පුද්ගලික හා රාජ්‍ය හවුල්කාරිත්වය (PPP)

පුද්ගලික හා රාජ්‍ය හවුල්කාරිත්වය මගින් අවදානම් සහ වගකීම් බෙදාහදා ගැනීම තුළින් රාජ්‍ය හා පෞද්ගලික යන දෙඅංශයේම කුසලතා හා සම්පත් ඒකාබද්ධ වන අතර එමඟින් තරඟකාරීත්වය වැඩිදියුණු වී රටට විශාල ප්‍රතිලාභ රැසක් ලැබෙනු ඇත. රට තුළ යටිතල පහසුකම් මූල්‍යකරණ ක්‍රමයක් ලෙස පුද්ගලික හා රාජ්‍ය හවුල්කාරිත්වය ප්‍රවර්ධනය කිරීම සඳහා, කොළඹ කොටස් හුවමාරුව තුළ පුද්ගලික හා රාජ්‍ය හවුල්කාරිත්වය සහිත යටිතල පහසුකම් ලයිස්තුගත කිරීමට හැකි ආකෘතියක් අපසකස් කරමින් සිටිමු.

• ඒකාබද්ධ මධ්‍යම ප්‍රතිපාර්ශව යාන්ත්‍රණය (CCP) සහ ගෙවීම් වලට එදිරිව බෙරුම්කිරීම (DVP)

ශ්‍රී ලංකා සුරැකුම්පත් සහ විනිමය කොමිෂන් සභාව ස්ථිරවම විශ්වාස කරන්නේ වෙන වෙනම මධ්‍යම ප්‍රතිපාර්ශව ආයතන දෙකක් තිබීමට වඩා තනි මධ්‍යම ප්‍රතිපාර්ශව ආයතනයක් තිබීමෙන් රටට වාසි සැළසෙන බවයි. එම අදහස යථාර්ථයක් බවට පත් කිරීමේ අරමුණින් ශ්‍රී ලංකා සුරැකුම්පත් සහ විනිමය කොමිෂන් සභාව සහ ශ්‍රී ලංකා මහ බැංකුව ඒකාබද්ධ මධ්‍යම ප්‍රතිපාර්ශව ආයතනයක් ස්ථාපිත කිරීමට ඇති හැකියාව පිළිබඳව විමසා බලන ලදී. ගෙවීම් වලට එදිරිව බේරුම් කිරීමේ යාන්ත්‍රණයක් (DVP) ක්‍රියාත්මක කිරීම සඳහා වන මෙහෙයුම් කාර්යයන් සඳහා වන පිරිවැය මෑතකදී කොමිසම විසින් අනුමත කරන ලද අතර, කොළඹ කොටස් හුවමාරුව විසින් 2020 අවසාන කාර්තුවට පෙර ගෙවීම් වලට එදිරිව බේරුම් කිරීමේ යාන්ත්‍රණය ක්‍රියාත්මක කිරීම සඳහා පද්ධතිමය වෙනස් කිරීම් සිදු කරමින් සිටී.

• පාර්ශවකරුවන් සමඟ පැවති සම්බන්ධතා

තවද, සභාපතිවරයා සහ නව කොමිෂන් සභාව විසින් සුරැකුම්පත් ක්ෂේත්‍රයේ නියලී සිටින පාර්ශවකරුවන් සමඟ ප්‍රාග්ධන වෙළෙඳපොළ සංවර්ධනය කිරීම පිළිබඳ අදහස් ලබා ගැනීම සහ ඔවුන් මුහුණ දෙන දුෂ්කරතාවලට විසඳුම් ලබාදීම සඳහා රැස්වීම් මාලාවක් පවත්වන ලදී. මෙම උපදේශන මගින් යටිතල පහසුකම් සංවර්ධනය හා ශක්තිමත් කිරීමටත් නියාමනයන් සරල කිරීමටත් අවබෝධයක් ලබා දී ඇත.

• ප්‍රතිපත්ති පර්යේෂණ හා විශ්ලේෂණ අංශය දියුණු කිරීම

නිරන්තරයෙන් වෙනස්වීම් වලට භාජනය වන ආර්ථික හා මූල්‍යමය තත්වයන් සමඟ නොගැළපීමේ අවශ්‍යතාවය ශ්‍රී ලංකා සුරැකුම්පත් සහ විනිමය කොමිෂන් සභාව තුළ පර්යේෂණ හා ප්‍රතිපත්ති අංශයක් සැකසීමට හේතු විය. ප්‍රාග්ධන වෙළෙඳපොළට සහ සමස්තයක් වශයෙන් රටට ප්‍රයෝජනවත් විය හැකි ආර්ථික,වෙළෙඳපොළ උපායමාර්ග සහ ප්‍රතිපත්ති සංවර්ධනය කිරීම හා යෝජනා කිරීම සඳහා අප ආයතනය පර්යේෂණ හා දත්ත විද්‍යාඥයාගේ කාර්යභාරය ඉටු කරනු ඇතැයි අපේක්ෂා කෙරේ.